आत्महत्येचे संकेत देऊन पोलीस झाला बेपत्ता !

जागर न्यूज : आत्महत्या करण्याचे संकेत देत एक पोलीस कर्मचारी अचानक बेपत्ता झाल्याने पोलीस दलात प्रचंड खळबळ उडाली आहे. 

परभणीतील एका पोलिस कर्मचाऱ्याने आत्महत्या करावी वाटते असं स्टेटस ठेवल्याने आणि नंतर तो कर्मचारी गायब झाल्याने प्रशासनात एकच खळबळ उडाली आहे. पोलिस निरीक्षकासोबत कामावरून वाद झाल्यानंतर अपमानित झाल्याची भावना या कर्मचाऱ्याच्या मनात निर्माण झाली. त्यानंतर 'आपल्याला आत्महत्येसारखे पाऊल उचलावं वाटतंय' असं व्हाट्सअप स्टेटस ठेवून पोलिस कर्मचारी गायब झाला आहे. या पोलिस कर्मचाऱ्याचा शोध घेतला जात आहे. आत्महत्येच्या घटनात अलीकडे वाढ तर झालीच आहे आणि आत्महत्येचे चित्रीकरण मोबाईलवर करीत आत्महत्या होताना दिसत आहेत. सोशल मीडियावर लाइव्ह आत्महत्या करण्याचे प्रकार देखील समोर आलेले आहेत. एका पोलिसाने मात्र आत्महत्या करण्याचे संकेत देणारे स्टेटस ठेवून पोलीस कर्मचारी गायब झाला आहे. 

परभणीच्या पाथरी पोलिस ठाण्यातील गोपनीय शाखेचे पोलिस जमादार रफिक मुस्ताक अन्सारी सकाळी कामावर हजर होते. त्यावेळी पाथरीत आज निघालेल्या तिरंगा रॅलीत कर्मचारी नियुक्ती आणि या रॅलीच्या माहितीबाबत पोलिस निरीक्षक गणेश राहिरे आणि पोलिस जमादार रफिक अन्सारी यांच्यात वाद झाला. याच वादातून दुपारी जेवणाची सुट्टी झाल्यानंतर २ वाजुन ४४ मिनिटांनी पोलीस जमादार रफिक अन्सारी यांनी स्वतःच्या व्हाट्सएप वर "आज रोजी पोलिस निरीक्षक श्री राहिरे साहेब यांनी मला अपमानित करून मला खूप वाईट वागणूक दिलेली आहे. मला खूप वाईट वाटले, आत्महत्या करावे यासारखे पाऊल उचलावेसे वाटते" असे स्टेटस ठेवले आणि ठाणे सोडले. यांनतर त्यांनी मोबाईल बंद केला. ही बाब पाथरीसह जिल्हा पोलीस प्रशासनात वाऱ्यासारखी पसरली आणि एकच खळबळ उडाली.

वरिष्ठ अधिकारी यांनी दिलेल्या वाईट वागणुकीचा त्याने उल्लेख केला असल्यामुळे अधिकारी वर्गात खळबळ उडालीच आहे परंतु बेपत्ता झालेला पोलीस कर्मचारी नक्की कुठे आहे याची काहीच माहिती मिळत नसल्याचे अधिकच चिंता वाढू लागली आहे. सदर पोलिसाचे कुटुंब देखील चिंतेत आहे शिवाय पोलीस दल देखील काळजीत आहे. बेपत्ता असलेला पोलीस कर्मचारी कुठलेही टोकाचे पाउल उचलणार नाही असा विश्वास अधिकारी व्युअक्त करीत आहेत.  

आमच्यात वाद नाही !

नवरात्रीमुळे सर्वत्र बंदोबस्त लावण्यात आला आहे, पाथरी पोलीस ठाण्याचे कर्मचारी मानवत येथे बंदोबस्तासाठी गेलेले आहेत. त्यामुळे आज सकाळी पाथरीत तिरंगा रॅली निघाली. त्याची माहिती आणि स्टेशन डायरीत बंदोबस्त नोंद घेण्याबाबत मी त्यांना सांगितले. मात्र त्यांनी त्यालाच अवघड मानलं आणि असे केले. परंतु आमच्यात वाद झाला नाही. ते येतील, आम्ही त्यांना शोधतोय अशी प्रतिक्रिया पाथरी पोलीस ठाण्याचे पोलिस निरीक्षक गणेश राहिरे यांनी दिली.