बारामती : 'आपण अजितदादा पवार यांचे फॅन आहोत' असं भारतीय जनता पक्षाचे आमदार जयकुमार गोरे यांनी स्पष्ट आणि जाहीरपणे सांगून टाकलं आणि राजकारणात चर्चेला एक नवा विषय आला. राज्यमंत्री दत्तात्रय भरणे यांनी तर लगेच गोरे याना राष्टवादीत येण्याची ऑफरच देऊन टाकली !
राज्य सरकार पडणार असल्याचे अनेक मुहूर्त आतापर्यत भारतीय जनता पक्षाच्या जवळपास सगळ्याच नेत्यांनी काढले पण महाविकास आघाडी सरकारने दोन वर्षे पूर्ण केली. अजूनही काही जण अशाच कंड्या पिकवत असताना भाजपचे आमदार जयकुमार गोरे यांनी मात्र उपमुख्यमंत्री अजित पवार यांचे तोंडभरून कौतुक तर केलेच पण आपण अजितदादांचा फॅन असल्याचेही जाहीरपणे सांगून टाकले. अजित पवार हे स्पष्टवक्ते आहेत त्यामुळे काही जण दुखावत असले तरी त्यांचा हा स्वभाव राजकारणात अनेकांना भावतो. अजित पवार हे कधी खोट्या वल्गना करीत नाहीत की वास्तवतेला विसरून काहीही घोषणा करीत नाहीत. त्यांच्या या स्वभावामुळे त्यांच्या लोकप्रियतेत वाढच झालेली आहे. आता तर विरोधक असलेल्या भारतीय जनता पक्षाच्या आमदारांनी जाहीरपणे अजित पवार यांच्यावर मुक्तहस्ते शब्दसुमने उधळली आहेत.
बारामती येथील एका रुग्णालयाच्या योजनेचा शुभारंभ आयोजित करण्यात आला होता. यावेळी भाजप आमदार जयकुमार गोरे, राज्यमंत्री दत्तात्रय भरणे उपस्थित होते. यावेळी बोलताना आमदार गोरे यांनी मनमोकळेपणे अजितदादांच्या कार्यशैलीचे कौतुक केले 'अजितदादांचे काम, दादांचे कर्तृत्व आपल्याला माहीत आहे. दादांची शिस्त मी पहिली आहे, आम्ही राजकीय विरोधक जरी असलो तरी राजकारणाच्या पलीकडे जाऊन मी अजितदादांचा फॅन आहे आणि मला हे मला सांगायला काही वाटत नाही. दादांचं धाडस, दादांचा स्पष्टवक्तेपणा मी पाहिला आहे, दादांना जसे हॉस्पिटल हवे होते तसे त्यांनी उभारले आहे, दत्तामामा भरणे असल्यामुळे तर काही प्रश्नच नाही. भरणे मामा आणि आपण जवळचे मित्र आहोत, आमदारकीच्या बाबतीत मी सिनियर असलो तरी बाकीच्या बाबतीत भरणेमामा सिनियर आहेत असेही आ. गोरे यावेळी बोलताना म्हणाले.
आ जयकुमार गोरे यांनी अजित दादांचे कौतुक केल्यानंतर राज्यमंत्री भरणे हे बोलायला उभे राहिले आणि त्यांनी गोरे याना थेट पक्षात येण्याचीच ऑफर देऊन टाकली. "बारामतीच्या नेत्यानी जर एखाद्याला हात दिला तर दगडात देखील पाणी काढू शकतात. आमच्या दादांचे तुम्ही तोंड भरून कौतुक केलंय. भाऊ तुम्ही हाडाचा कार्यकर्ता आहात. चुकतो तोच माणूस असतो. आमच्या नेत्याचा उल्लेख चांगला केला आहे. तुमच्या डोक्यात चांगला विचार येऊ द्या आणि भविष्यात चांगला विचार भविष्यात करा' असं म्हणत भरणेंनी जयकुमार गोरेंना राष्ट्रवादीची ऑफर दिली.
आमदार जयकुमार गोरे बोलत असताना उपस्थितांनी उत्स्फूर्त दाद दिलीच पण भरणे मामा यांनी त्यांना राष्ट्रवादी पक्षात येण्याची ऑफर देताच उपस्थितांनी टाळ्या वाजवून भरणे मामांच्या विधानांना पाठिंबा व्यक्त केला. आ. गोरे हे राजकारणाच्या पलीकडे जाऊन बोलत होते पण त्यांच्या विधानाचा व्हिडीओ अनेकांनी व्हायरल केला आणि राजकीय वर्तुळात वेगळी चर्चा देखील सुरु झाली.
कोणत्याही टिप्पण्‍या नाहीत:
टिप्पणी पोस्ट करा